3.0 Ubah sepil dalam sistem sepil jaku Iban

Taja pan jaku kitai Iban ngembuan sistem sepil kediri empu. Tang kitai agi minjau leka jaku ari jaku bansa bukai. Jaku Iban tebal agi minjau leka jaku English. Nya alai, mayuh amat ubah sepil dalam sistem sepil jaku Iban. Nitihka bup sistem sepil jaku Iban di sekula madahka semua sepil leka jaku injau ari English ti mai urup “tion”, “ssion”, “shion” tauka “sion” ba ujung sepil diubah ngagai “syen” ba sepil Iban. Ambika chunto, television ditukar nyadi televisyen, station nyadi stesyen, version nyadi versyen. Taja pia, enti leka jaku nya datai ari tengah-tengah leka jaku, sepil iya ditukar nyadi “sion”. Ambika chunto, dictionary nyadi diksionari, cushion betukar nyadi kusyen enggau national nyadi nasional.

Kelimpah ari nya, sistem sepil leka jaku ke bisi ubah iya nya urup ‘o’ ke dikena ba patah sebut baikka nya datai ba mua tauka ujung patah sebut. Nitihka bup Sistem Jaku Iban Di Sekula ke dikeluarka Pusat Perkembangan Kurikulum bejuraika dalam jaku Iban tulin, urup ‘o’ semina diengkah ba ujung leka jaku. Taja pia, dalam jaku injau, urup ‘o’ bisi dikena ba sebarang alai iya nya ba pun, tengah enggau ujung leka jaku. Ambika sema, orang, opis, vokal enggau radio.  

Nangkanka nya mega, sistem sepil tu mega ulih berubah ba urup vokal berimbai dua enggau tiga sereta vokal sengian. Enti disingkap kitai ari sukut vokal berimbai dua baka oa, ao enggai io. Dia semua endur vokal o dalam jaku Iban tulin ditambak vokal u. Ambika chunto vokal oa iya nya menoa ditukar ngagai menua. Chunto ao iya nya leka jaku remaong ditukar nyadi remaung lalu vokal io iya nya beliong ditukar nyadi beliung. Nyadi dalam kes tu, urup o dalam vokal nya tadi ditukar nyadi urup u. 

Ngalih ngagai vokal berimbai tiga ke bisi ubah chara nyepil iya nya vokal aia enggau aio. Ambika chunto, aia iya nya leka jaku maia betukar nyadi maya lalu aio iya nya maioh betukar mayuh. Enti diperatika ari vokal sengian, jaku Iban endang ngembuan sekeda vokal sengian ti enda nyengala disebut taja pan segenda ditulis ba leka jaku. Jaku Iban tulin endang nadai ngembuan turu konsonan rt enggau rb, nya alai lebuh nyepil leka jaku tu kitai meseti nyelepakka iya enggau urup e. Ambika chunto, leka jaku chermin ditambahka enggau urup e nyadi cheremin. 

Ditetak ngena jaku pandak, ubah sepil dalam dalam sistem sepil jaku Iban tu nyadi ketegal kitai minjau leka jaku orang bukai enggau berubah nitihka segang pemansang dunya sereta kaul dilah lebuh nyebut leka jaku nya.